كنت في اجتماع المدونين السعوديين في الرياض والتي أقيمت الشهر الماضي. كان معنا الأخ أبو هاشم وكانت معه ماشاء الله كاميرا رائعة جداً. المهم ان الرجال ما قصر وعطاني الكاميرا عشان أصور فيها (وطبعا مالي إلا خبرة بسيطة في التصوير) وانا اللي أصور اول احد قدامي “حرباز” وطلعت الصورة خيالية وبالذات العزل focus كان أكثر من رائع. بعدها بصراحة حسيت ان الكاميرا اللي عندي ما تسوى شي 
بعد هذا الاجتماع بفترة بسيطة وفي معرض جايتكس بالتحديد، وفي وقت تغطيتنا للمعرض لـ قناة التقنية العربية، قابلنا أحد المصور القدير عبدالرحمن الفنتوخ وهو ماشاء الله علي بعدته “أي بأدواته” وأخذ لنا صورة أنا وحرباز “ياكثره :)”
بعد ما شفت الصورة قلت خلاص ما بدهاش أبي أصير مصور (خلاص مافيه حل الرجال مسكت معه)، و بدأت في البحث عن الكاميرا المناسبة. في هذه الفترة تذكرت ان عندي كاميرا فوتوغرافية احترافية غير رقمية (احترافية مش حالك).
طلعتها وبدأت التصوير ولكن المشكلة اللي واجهتني ان ماعندي الخبرة الكافية لاختيار الاعدادات المناسبة من ناحية سرعة الغالق و الآيزو. المهم اني أخذت صور كثيرة في البيت لنفس المكان ولكن بإعدادات مختلفة لأرى الاختلاف ما بين الصور. ولحد الأن لم أحمض الفيلم بصراحة معاناة احتراف التصوير للجيل القديم لأنه لازم يصور ثم ينتظر حتى يتم تحميض الفلم
المهم وانا ابحث في الكاميرات حطيت عيني على كانون 400d واللي أتوقع انها رائعة (في البداية على الأقل) و لحد الآن انا متردد هل أشتري كاميرا أو لا؟ وبعد الاستخارة و حيرة لاسبوع كامل قررت اني اشوف إذا العدسات الموجودة عندي تركب على الكانون، توكلت على الله وشريت وإذا مستحيل خلاص انسى الفكرة على الأقل في الفترة الحالية. ذهبت إلى وكيل كانون في الرياض وسألته إذا فيه امكانية اني اركب عدسات الكميرا القديمة (زينيت) على الكانون وقعد يضحك وقال مستحيل
تحطمت وانا في افكر ليش مستحيل؟؟ مو المفروض انه بس قطعة عشان تحول حجم رأس العدسة وخلاص؟ (متعود على المواصير :)) بحثت في الانترنت ولقيت محول وخلاص قررت اني اشتري الكاميرا والمحول 
وتشوفون تحت الأشياء اللي طلبتها:
1. الكاميرا مع العدسة الأساسية.
2. مرشحات
3. ذاكرة 1غيغا وقارئ ذاكرة
4. مواد تنظيف و قاعدة صغيرة
5. قاعدة كبيرة
6. حقيبة
تم طلب القطع المطلوبة وأنا الآن في انتظار وصولها وانشاء الله تكون بداية جيدة لهواية التصوير ولا تكون مسكة (كعادتي :))
